بحب حاجات كتير

بحب الوضوح
ماليش فى الغموض
وبكره اللون الرمادى فى الردود
يا أبيض.. يا أسود
محدد وواضح
ولا أعرف أطنطن وأزيف وعود
ولا أعرف أهلل وأطبل لكدبة
ولا أنكر معانى الجمال فى الوجود
ماليش فى الغموض
وأحب البراح
وفارد لكل الحبايب جناح
وحالف ما أضيع دقيقه فى عمرى
فى حزن وكآبة
لأن اللى رايح
لا يمكن يعود
وأحب الهدوء
وبسمة رقيقة تخلى المشاعر فى لحظة تروق
وصوتك يا ثومة فى ساعة عصارى
ولمة أبويا وأخويا وجارى
وشعر لجاهين
ولحظة ما غايب لوطنه يعود
بحب الوضوح
ماليش فى الغموض